Տավուշի մարզի սահմանամերձ Չորաթան գյուղում արդեն 25 տարի գործում է «Մխիթար» երիտասարդական կենտրոնը, որտեղ գրեթե ամեն օր դասից հետո հավաքվում են հարակից գյուղերի երեխաները՝ կրթվելու, նոր արհեստ ու արվեստ սովորելու և իրենց ժամանցը կազմակերպելու համար։

«Մխիթար» երիտասարդական կենտրոնը «Ստեփան Գիշյան» բարեգործական հիմնադրամի ամենամյա դրամաշնորհային ծրագրի շահառուներից է. դրամաշնորհի միջոցով կենտրոնը ձեռք է բերել միկրոավտոբուս, որն ամենօրյա պարբերականությամբ կենտրոն է տեղափոխում հարակից գյուղերի երեխաներին: Միկրոավտոբուսի ձեռքբերումից հետո կենտրոն հաճախող սաների թիվը կրկնապատկվել է. նախկին 100 երեխայի փոխարեն այժմ կենտրոն է հաճախում ավելի քան 200 երեխա։

«Տրամադրված դրամաշնորհի միջոցով ձեռք բերված միկրոավտոբուսի շնորհիվ Չորաթան գյուղ հարակից 3 գյուղի՝ Արծվաբերդի, Նորաշենի ու Վերին Կարմիր Աղբյուրի երեխաները ևս կկարողանան հաճախել «Մխիթար» երիտասարդական կրթամշակութային կենտրոն։ Դա թույլ  կտա երեխաներին ստանալ անվճար հիմունքներով կրթություն, զարգացնել հմտությունները և արդյունավետ կազմակերպել իրենց ազատ ժամանակը»,- նշել է «Ստեփան Գիշյան» բարեգործական հիմնադրամի տնօրեն Աննա Գիշյանը:

«Կենտրոնի գոյությունն իսկապես շատ կարևոր օղակ է սահմանամերձ գյուղերում ապրող երեխաների համար, որտեղ մոտ 200 աշակերտ է  հաճախում 18 տարբեր խմբակ՝ կարատե, հելունագործություն, ասեղնագործություն, նկարչություն, երաժշտություն, հայկական պար, երգեցողություն, թատրոն և այլն։

«Ստեփան Գիշյան» բարեգործական հիմնադրամի դրամաշնորհի աջակցությամբ, ինչպես նաև Մխիթարյան միաբանության նախկին սաների հովանավորությամբ լուծվեց միկրոավտոբուսի խնդիրը, որը հարևան գյուղերից օրական  3–4 անգամ մոտ 100 աշակերտ է տեղափոխում «Մխիթար» երիտասարդական կենտրոն»,- նշել է «Մխիթար» երիտասարդական կենտրոնի տնօրեն Էդգար Քալանթարյանը։

«Ստեփան Գիշյան» բարեգործական հիմնադրամը ստեղծվել է Ակբա բանկի, ֆրանսիական Կրեդիտ Ագրիկոլ, Կրեդիտ Ագրիկոլ Ազգային Ֆեդերացիայի և Գիշյան ընտանիքի կողմից: Հիմնադրամի ծրագրերն ուղղված են հայ-ֆրանսիական կապերի ամրապնդմանը, Հայաստանի սոցիալ-տնտեսական, գիտակրթական, մշակութային, առողջապահական համակարգերի բարելավմանն ու կատարելագործմանը:

Մանրամասն՝ տեսանյութում։