Պրոֆեսոր Յոլյանի անվան արյունաբանական կենտրոնի լաբորատորիան համալրվել է նոր սարքավորումներով, որոնք կօգնեն միջազգային չափանիշներին համապատասխան գենետիկ հետազոտություններ կատարել։
Արյունաբանական կենտրոնը «Ստեփան Գիշյան» բարեգործական հիմնադրամի 2022 թվականի շահառուներից է. դրամական աջակցության շնորհիվ կենտրոնն իր մոլեկուլային կենսաբանության բաժանմունքի համար ձեռք է բերել անհրաժեշտ սարքավորումեր։ Այժմ կատարվում են հետազոտություններ, որոնք օգնելու են բուժման նոր մեթոդոլոգիայի մշակմանը։
Նախագիծը նպաստելու է ոչ միայն Հայաստանում, այլև երկրի սահմաններից դուրս գենետիկ հետազոտությունների զարգացմանն ու թերապևտիկ նոր մոտեցումների և ռազմավարությունների մշակմանը։ Ստեղծվում է ԴՆԹ և ՌՆԹ բանկ՝ երկարաժամկետ ծարգիր, որը թույլ կտա նոր թերապիաներ մշակել բուժառուների համար։
«Յոլյանի անվան արյունաբանական կենտրոնը եզակի մասնագիտացված կենտրոն է, որն իրականացնում է արյան համակարգի հիվանդությունների ախտորոշում և բուժում։ Այս փաստը ևս մեզ հնարավորություն է տվել աջակցել այս կենտրոնին, քանի որ շահառուները, ովքեր պետք է օգտվեն այս ծրագրից, ոչ միայն Հայաստանում բնակվող բուժառուներն են, այլև օտարերկրացիները։ Տարածաշրջանի համար այս կենտրոնը մեծ նշանակություն ունի։ Մեզ համար կարևոր է աջակցել այն ծրագրերին, որոնք մշակում են նորարարական լուծումներ և ուղղված են տվյալ ոլորտի զարգացմանն ու կատարելագործմանը, հիմնախնդիրների լուծմանը»,- նշել է «Ստեփան Գիշյան» բարեգործական հիմնադրամի տնօրեն Աննա Գիշյանը:
«Բժշկությունն առաջ է գնում և ժամանակի հետ նորագույն, ժամանակակից ապարատուրայի կարիքը խիստ անհրաժեշտ է լինում, որ միջազգային ստանդարտներին համապատասխան լինի ախտորոշումը։ Եթե ախտորոշումը հստակ չլինի, բուժման տակտիկան նույնպես կկաղի»,- նշել է պրոֆեսոր Յոլյանի անվան արյունաբանական կենտրոնի տնօրեն Սամվել Դանիելյանը։
«Ծրագիրը սկսել ենք «Ստեփան Գիշյան» բարեգործական հիմնադրամի աջակցությամբ։ Հիմնադրամը մեզ հնարավորություն է տվել ձեռք բերել ԴՆԹ-ի անջատման կիտեր, -80 սառնարան, ավտոկլավ։ Ծրագրի հիմնական նպատակն է ստեղծել ԴՆԹ բանկ՝ արյան չարորակ հիվանդությունների պերիֆերիկ արյունից»,- նշել է պրոֆեսոր Յոլյանի անվան արյունաբանական կենտրոնի մոլեկուլային կենսաբանական բաժանմունքի ղեկավար Նարինե Ղազարյանը։
«Ստեփան Գիշյան» բարեգործական հիմնադրամը ստեղծվել է Ակբա բանկի, ֆրանսիական Կրեդիտ Ագրիկոլ, Կրեդիտ Ագրիկոլ Ազգային Ֆեդերացիայի և Գիշյան ընտանիքի կողմից: Հիմնադրամի ծրագրերն ուղղված են հայ-ֆրանսիական կապերի ամրապնդմանը, Հայաստանի սոցիալ-տնտեսական, գիտակրթական, մշակութային, առողջապահական համակարգերի բարելավմանն ու կատարելագործմանը:
Մանրամասն՝ տեսանյութում։
